ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានរម្លឹកពូបុព្វកដានៃរដ្ឋធម្មនុញ្ញកម្ពុជា និងអំពាវនាវដល់ពលរដ្ឋកុំចាញ់បោកក្រុមដែលប្រឆាំងរាជរដ្ឋាភិបាលកម្ពុជា ឃោសនាឱ្យគូសសន្លឹកឆ្នោតចោល។

ក្នុងសេចក្ដីប្រកាសព័ត៌មានចុះថ្ងៃទី១១ ខែកក្កដា ឆ្នាំ២០២៣ គ.ជ.ប បានរម្លឹកនូវបុព្វកថាមួយដែលបានសរសេរក្នុងរដ្ឋធម្មនុញ្ញកម្ពុជាថា «យើងប្រជារាស្ត្រខ្មែឬបានភ្ញាក់រលឹក ក្រោយឈរឡើង ចងបាច់ឆន្ទះមោះមុត ប្ដូរផ្ដាច់ រួបរួមគ្នាពង្រឹងឯកភាពជាតិ រក្សាការពារ ទឹកដីកម្ពុជា អធិបតេយ្យថ្លៃថ្នូ និងអារ្យធម៌អង្គរដ៏បវរ កសាងប្រទេសជាតិឱ្យទៅជាកោះសន្ដិភាពឡើងវិញផ្អែកលើប្រព័ន្ធប្រជាធិបតេយ្យសេរីពហុបក្ស ធានាសិទ្ធិមនុស្ស គោរពច្បាប់ ទទួលខុសត្រូវចំពោះវាសនាអនាគតជាតិ ឱ្យបានឈានឡើងរីកចំរើន លូតលាស់ សម្បូររុងរឿងជានិច្ចនិរន្តរ៍»។

ក្រៅពីរម្លឹកនូវបុព្វកថានេះ គ.ជ.ប បានលើកទឹកចិត្តដល់ម្ចាស់ឆ្នោត សូមគូសធិក គាំទ្រគណបក្សនយោបាយដែលខ្លួនស្រឡាញ់ពេញចិត្តដូចដែលបានធ្លាប់បោះឆ្នោតកាលពីកន្លងទៅផងដែរ។

ស្របគ្នានោះដែរ គ.ជ.ប បានព្រមានដល់អ្នកដែលញុះញ៉ង់ឱ្យគូសបំផ្លាញសន្ដឹកឆ្នោតត្រូវនឹងត្រូវទទួលខុសត្រូវតាមផ្លូវច្បាប់ផងដែរ។ ដោយបានបញ្ជាក់ថា ទង្វើបែបនេះ នឹងត្រូវប្រឈមនឹងច្បាប់ស្តីការបោះឆ្នោតតាមមាត្រា១៤២ថ្មី ដែលចែងថាត្រូវផាកពិន័យជាប្រាក់ពី ៥លានរៀលទៅ ២០លានរៀល ដោយ គ.ជ.ប ដោយពុំទាន់គិតដល់ទោសព្រហ្មទណ្ឌផ្សេងទៀត។

លើសពីនេះ ជនដែលណែនាំពលរដ្ឋគូសសន្លឹកឆ្នោតមិនបានការ នឹងត្រូវលុបឈ្មោះចេញពីបញ្ជីបោះឆ្នោត ឬលុបបេក្ខភាពរបស់សាមីខ្លួន ឬដកសិទ្ធិឈរឈ្មោះឱ្យគេបោះឆ្នោត របស់សាមីខ្លួនសម្រាប់រយៈពេល៥ឆ្នាំយ៉ាងតិចបន្ថែមទៀត ដោយគណៈកម្មាធិការជាតិរៀបចំការបោះឆ្នោត។

គ.ជ.ប បានទទូចប្រជាពលរដ្ឋ កុំចាញ់បោកទង្វើទុក្ខអគតិមួយចំនួន ដែលមានចេតនាបំផ្លាញលទ្ធិប្រជាធិបតេយ្យ បំផ្លាញសិទ្ធិបងប្អូន និងនាំឱ្យប្រព្រឹត្តអំពើផ្ទុយនឹងច្បាប់៕